ეს ამბავი 12-13 წლის წინ მოხდა კახეთში. ბიჭებმა გადაწყვიტეს დენით ეთევზავათ. იშოვეს პატარა „დვიჟოკი“ დააკრეს ვირზე და წავიდნენ მდინარეზე. ადგილზე მისვლისას დაქოქეს „დვიჟოკი“ თან ისე, რომ ვირიდან არ ჩამოუღიათ. შეშინდა ვირი ძრავის ხმაზე და სახლისკენ გამოიქცა.
როცა ამ ვირმა დასახლებულ პუნქტამდე მიაღწია უკვე კარგად იყო დაბინდებული, სილუეტებიღა ჩანდა.
ამ დროს ერთი ქალი მიდიოდა ორღობეში. უკნიდან შემოესმა ამ „დვიჟოკის“ ხმა. იფიქრა მოტოციკლეტი მოდისო. ხმა რომ მოუახლოვდა უკან მოიხედა და ….
მეზობლებმა გულწასული იპოვეს, დაუწყეს მოსულიერება:
– რა იყო, რა მოგივიდა?
გულწასული ცოტა აზრზე მოვიდა:
– ვაიმე, ხალხო, დაქოქილი ვირი ვნახე… – და ისევ გადაატრიალა თვალები.
ვირმა კი ირბინა აღმა-დაღმა „დვიჟოკში“ საწვავის გათავებამდე…