ერთი ქალის სახლში თაგვები გამრავლდნენ. ბევრი ეცადა, მაგრამ ვერაფრით ვერ დახოცა და მოიშორა თავიდან. ბოლოს წავიდა მკითხავთან. მკითხავმა შეულოცა და უთხრა:
– მე თაგვებს შევულოცე, მიხვალ სახლში, გააღებ კარს და ხმამაღლა იტყვი: “თაგვებო დატოვეთ თქვენი სამყოფელი” და წავლენ. მთავარია, არ უნდა გაგეცინოს და არც გაგეღიმოს.
მივიდა ქალი სახლში. გააღო კარი. წარმოთქვა შესაბამისი სიტყვები. დამწკრივდნენ თაგვები და დაღონებულები გადიან სახლიდან. ბოლო თაგვმა საწყლად ამოხედა სახლის პატრონს. გახარებულ ქალს სიხარულისგან გაეღიმა. ბოლო თაგვმა შენიშნა ეს ღიმილი და დანარჩენებს გასძახა:
– დაბრუნდით, დაბრუნდით, გიღიმა, ესე იგი, იხუმრა, იხუმრა!